KHak-dan ko mawara-e-asman le jaega

ḳhāk-dāñ ko māvarā-e-āsmāñ le jā.egā

jo parinda sar pa rakh kar āshiyāñ le jā.egā

maiñ faqat piitā rahūñgā sāhiloñ kī tishnagī

vo samundar kī sabhī tuġhyāniyāñ le jā.egā

jab utar jā.eñgī tah meñ ḳhvāhishoñ kī kashtiyāñ

nāḳhudā us vaqt apne bādbāñ le jā.egā

kārvāñ ke sab musāfir sochte haiñ shaam se

sub.h-dam kis samt mīr-e-kārvāñ le jā.egā

kyā ḳhabar hai kis kī pahle putliyāñ phir jā.eñgī

kaun apne saath kyā sūd-o-ziyāñ le jā.egā

ham kināroñ par khaḌe ginte raheñge mauj mauj

aur safīne ko kahīñ āb-e-ravāñ le jā.egā

ab to ḳhatre meñ hai 'mohsin' ḳhirqa-e-darvesh bhī

tū bachā kar shamla-e-izzat kahāñ le jā.egā

KHak-dan ko mawara-e-asman le jaega

jo parinda sar pa rakh kar aashiyan le jaega

main faqat pita rahunga sahilon ki tishnagi

wo samundar ki sabhi tughyaniyan le jaega

jab utar jaengi tah mein KHwahishon ki kashtiyan

naKHuda us waqt apne baadban le jaega

karwan ke sab musafir sochte hain sham se

subh-dam kis samt mir-e-karwan le jaega

kya KHabar hai kis ki pahle putliyan phir jaengi

kaun apne sath kya sud-o-ziyan le jaega

hum kinaron par khaDe ginte rahenge mauj mauj

aur safine ko kahin aab-e-rawan le jaega

ab to KHatre mein hai 'mohsin' KHirqa-e-darwesh bhi

tu bacha kar shamla-e-izzat kahan le jaega