KHamoshi mein guzara kar raha hun

ḳhamoshī meñ guzāra kar rahā huuñ

isī se shor paidā kar rahā huuñ

nayā rishta bane is 'umr meñ kyā

purāne ko purānā kar rahā huuñ

mire rone pe mujh ko Tokiye mat

kamā.ī hai to ḳharcha kar rahā huuñ

mohabbat ne diye jo zaḳhm mujh ko

unheñ nafrat se achchhā kar rahā huuñ

ye duniyā kyā mirī nazroñ meñ aa.e

baḌe ḳhvāboñ kā pīchhā kar rahā huuñ

sañbhaltā huuñ to ye lagtā hai mujh ko

tumhāre saath dhokā kar rahā huuñ

tabīboñ meñ ghirā rahtā huuñ 'shāriq'

maraz ko jān-levā kar rahā huuñ

KHamoshi mein guzara kar raha hun

isi se shor paida kar raha hun

naya rishta bane is 'umr mein kya

purane ko purana kar raha hun

mere rone pe mujh ko Tokiye mat

kamai hai to KHarcha kar raha hun

mohabbat ne diye jo zaKHm mujh ko

unhen nafrat se achchha kar raha hun

ye duniya kya meri nazron mein aae

baDe KHwabon ka pichha kar raha hun

sanbhalta hun to ye lagta hai mujh ko

tumhaare sath dhoka kar raha hun

tabibon mein ghira rahta hun 'shaariq'

maraz ko jaan-lewa kar raha hun