khinch kar tu le gaya hai jis taraf banta nahin

khīñch kar tū le gayā hai jis taraf bantā nahīñ

tū yaqīnan baat merī Thiik se samjhā nahīñ

merī chup kī guftugū ko sunñe vaale chup rahe

aur bhī kuchh bolnā thā aur maiñ bolā nahīñ

'umr saarī kaT ga.ī donoñ kī darvāze ke paas

maiñ ne dastak dī nahīñ aur us ne dar kholā nahīñ

tere raste meñ paḌā thā ek patthar kī tarah

phir tirī Thokar lagī aur maiñ kahīñ Thahrā nahīñ

ik jagah par chhoḌ kar ḳhud ko maiñ aage chal diyā

aur phir maiñ vāpsī par us jagah par thā nahīñ

rū-barū mere vahī hai chār-sū mere vahī

ek muddat se jo mere sāmne aayā nahīñ

sānahe kī aur kaisī shakl hotī hai 'uzair'

us ne dil pe haath rakkhā aur dil dhaḌkā nahīñ

khinch kar tu le gaya hai jis taraf banta nahin

tu yaqinan baat meri Thik se samjha nahin

meri chup ki guftugu ko sunne wale chup rahe

aur bhi kuchh bolna tha aur main bola nahin

'umr sari kaT gai donon ki darwaze ke pas

main ne dastak di nahin aur us ne dar khola nahin

tere raste mein paDa tha ek patthar ki tarah

phir teri Thokar lagi aur main kahin Thahra nahin

ek jagah par chhoD kar KHud ko main aage chal diya

aur phir main wapsi par us jagah par tha nahin

ru-baru mere wahi hai chaar-su mere wahi

ek muddat se jo mere samne aaya nahin

sanahe ki aur kaisi shakl hoti hai 'uzair'

us ne dil pe hath rakkha aur dil dhaDka nahin