KHud se bhi wo Darta hoga

ḳhud se bhī vo Dartā hogā

vo bhī mere jaisā hogā

zaḳhm-e-jigar se jo Tapkā hai

us kī aañkh se bahtā hogā

sochoñ meñ aa.e chupke se

nañge paañv chaltā hogā

dar pe dastak dene vaalā

us kī yaad kā jhoñkā hogā

mahak uThā hai merā badan bhī

ḳhushbū meñ vo rahtā hogā

sat.h-e-āb pe ik chehra hai

lahroñ meñ vo rahtā hogā

ab to ḳhvāb jazīroñ meñ vo

yaad ke kañkar chuntā hogā

khoyā khoyā sā ḳhud maiñ hī

logoñ se vo miltā hogā

dekh ke girte pattoñ ko vo

pahroñ baiTh ke rotā hogā

dasht-e-ġham ke sannāTe meñ

vo bhī tanhā tanhā hogā

dil meñ chhupā kar merī yādeñ

pahroñ nazmeñ likhtā hogā

mast havāoñ se hī 'umar' vo

mere naġhme suntā hogā

KHud se bhi wo Darta hoga

wo bhi mere jaisa hoga

zaKHm-e-jigar se jo Tapka hai

us ki aankh se bahta hoga

sochon mein aae chupke se

nange panw chalta hoga

dar pe dastak dene wala

us ki yaad ka jhonka hoga

mahak uTha hai mera badan bhi

KHushbu mein wo rahta hoga

sath-e-ab pe ek chehra hai

lahron mein wo rahta hoga

ab to KHwab jaziron mein wo

yaad ke kankar chunta hoga

khoya khoya sa KHud main hi

logon se wo milta hoga

dekh ke girte patton ko wo

pahron baiTh ke rota hoga

dasht-e-gham ke sannaTe mein

wo bhi tanha tanha hoga

dil mein chhupa kar meri yaaden

pahron nazmen likhta hoga

mast hawaon se hi 'umar' wo

mere naghme sunta hoga