KHushbu hai agar yar to KHushbu pe fida main

ḳhushbū hai agar yaar to ḳhushbū pe fidā maiñ

vo husn charāġhoñ kā charāġhoñ kī ziyā maiñ

kartā huuñ safar guzre zamānoñ kā shab-o-roz

rahtā nahīñ ik lamha buzurgoñ se judā maiñ

duniyā ke jazīroñ meñ tirā bhed na paayā

hālāñki ḳhalāoñ meñ bhī har samt gayā maiñ

shāyad koī zarḳhez bhañvar yaad kā ubhrā

kal raat kisī aañkh se bahtā hī rahā maiñ

maare haiñ ġham-e-zīst ne pur-dard tamāñche

lekin kisī manzil pe nahīñ thak ke girā maiñ

hairat kī nigāhoñ se sabhī dekh rahe the

jab kūcha-e-jānāñ meñ gayā ban ke gadā maiñ

'jāmī' mirī guftār kisī par na khulī thī

sab log purāne the faqat ek nayā maiñ

KHushbu hai agar yar to KHushbu pe fida main

wo husn charaghon ka charaghon ki ziya main

karta hun safar guzre zamanon ka shab-o-roz

rahta nahin ek lamha buzurgon se juda main

duniya ke jaziron mein tera bhed na paya

haalanki KHalaon mein bhi har samt gaya main

shayad koi zarKHez bhanwar yaad ka ubhra

kal raat kisi aankh se bahta hi raha main

mare hain gham-e-zist ne pur-dard tamanche

lekin kisi manzil pe nahin thak ke gira main

hairat ki nigahon se sabhi dekh rahe the

jab kucha-e-jaanan mein gaya ban ke gada main

'jami' meri guftar kisi par na khuli thi

sab log purane the faqat ek naya main