kisi bhi khet pe barse kahin ka ho jae

kisī bhī khet pe barse kahīñ kā ho jaa.e

ḳhudā kare ki ye bādal zamīñ kā ho jaa.e

du'ā karo vo sitāra zamīñ pe TuuT gire

hamāre saath rahe aur yahīñ kā ho jaa.e

'ajab nahīñ ki jahāñ ham gumān se nikleñ

vahīñ pe qatl dobāra yaqīñ kā ho jaa.e

ye chāhtā huuñ ki ab ke falak kā koī 'azāb

makāñ ke naam na utre makīñ kā ho jaa.e

maiñ us ke jism kā sab zahr pī ke mar jā.ūñ

agar vo saañp mirī āstīñ kā ho jaa.e

mire 'shakīl' ko pariyoñ ke des mat bhejo

'ajab nahīñ ki ye pāgal vahīñ kā ho jaa.e

kisi bhi khet pe barse kahin ka ho jae

KHuda kare ki ye baadal zamin ka ho jae

du'a karo wo sitara zamin pe TuT gire

hamare sath rahe aur yahin ka ho jae

'ajab nahin ki jahan hum guman se niklen

wahin pe qatl dobara yaqin ka ho jae

ye chahta hun ki ab ke falak ka koi 'azab

makan ke nam na utre makin ka ho jae

main us ke jism ka sab zahr pi ke mar jaun

agar wo sanp meri aastin ka ho jae

mere 'shakil' ko pariyon ke des mat bhejo

'ajab nahin ki ye pagal wahin ka ho jae