kisi ko kaise dikhaun main apni raat ke khel

kisī ko kaise dikhā.ūñ maiñ apnī raat ke khel

jo merī zaat meñ hote haiñ kā.enāt ke khel

gunāh itne baḌhā.e ki pul hī toḌ diyā

pul-e-sirāt se khele pul-e-sirāt ke khel

khilāḌī ham haiñ magar kheltā hai aur koī

hamāre haath meñ kab haiñ hamāre haat ke khel

ham is bisāt pe ulTī taraf se baiThe haiñ

hamāre haath meñ aa.e haiñ saare maat ke khel

ham apne ḳhuuñ kī ravānī meñ she'r likhte haiñ

udhar vo khel rahe haiñ qalam davāt ke khel

badan bachāo ki ab ke badan kī baarī hai

ki ruuh khel chukī apne sab najāt ke khel

ye log maut se itne Dare hue haiñ ki bas

koī sikhā.e kahāñ tak inheñ hayāt ke khel

kisi ko kaise dikhaun main apni raat ke khel

jo meri zat mein hote hain kaenat ke khel

gunah itne baDhae ki pul hi toD diya

pul-e-siraat se khele pul-e-siraat ke khel

khilaDi hum hain magar khelta hai aur koi

hamare hath mein kab hain hamare hat ke khel

hum is bisat pe ulTi taraf se baiThe hain

hamare hath mein aae hain sare mat ke khel

hum apne KHun ki rawani mein she'r likhte hain

udhar wo khel rahe hain qalam dawat ke khel

badan bachao ki ab ke badan ki bari hai

ki ruh khel chuki apne sab najat ke khel

ye log maut se itne Dare hue hain ki bas

koi sikhae kahan tak inhen hayat ke khel