کسی سے اب کوئی ملنے کسی کے گھر نہیں جاتا

کسی سے اب کوئی ملنے کسی کے گھر نہیں جاتا

مری آنکھوں سے گزرے وقت کا منظر نہیں جاتا

بہت مغرور تھا انسان خود اپنی ترقی پر

قیامت آئی یہ کیسی کوئی باہر نہیں جاتا

ہوا کا رخ جدھر بھی ہے چراغوں کو ادھر رکھ لو

ہو جن میں حوصلہ ان کو کوئی چھو کر نہیں جاتا

زمانہ واقعی بدلا ہوا لگتا ہے اب مجھ کو

یہاں انسان اب تو چار کاندھوں پر نہیں جاتا

ترے دربار میں ہوتا ہے ہر اک فیصلہ مولیٰ

عدالت میں تبھی تو مسئلہ لے کر نہیں جاتا

بہت مشکل ہے دہشت اور نفرت کو بڑھا دینا

سیاست کی زباں سے جب تلک نشتر نہیں جاتا

ہو جب دل آزما لینا مرے صبر و تحمل کو

تمہارے ظلم کے خنجر سے اب میں ڈر نہیں جاتا

حکومت اپنی آنکھوں پر پہنتی حق کا چشمہ جو

تمہاری بات بھی رہتی ہمارا سر نہیں جاتا