kitni sarkash bhi ho sar-phiri ye hawa rakhna raushan diya

kitnī sarkash bhī ho sar-phirī ye havā rakhnā raushan diyā

raat jab tak rahe ai mire ham-navā rakhnā raushan diyā

raushnī kā vazīfa nahīñ vo chale rāsta dekh kar

vo to āzād hai misl-e-mauj-e-sabā rakhnā raushan diyā

raat kaisī bhī ho ḳhauf ke chor kī ghaat kaisī bhī ho

apnī ummīd kā apne vishvās kā rakhnā raushan diyā

shab kī be-ant zulmat se laḌ saktī hai ek nannhī sī lau

raah bhūle huoñ ko hai bāñg-e-darā rakhnā raushan diyā

āshnā kī sadā ghup-añdhere meñ ban jaatī hai raushnī

is shab-e-tār meñ apnī āvāz kā rakhnā raushan diyā

raushnī kī sharī.at meñ roz-e-azal se yahī darj hai

jot se jot jaltī rahegī sadā rakhnā raushan diyā

mujh se 'amjad' kahā jhilmilāte hue aḳhtar-e-shām ne

us ko aanā hī hai vo zarūr aa.egā rakhnā raushan diyā

kitni sarkash bhi ho sar-phiri ye hawa rakhna raushan diya

raat jab tak rahe ai mere ham-nawa rakhna raushan diya

raushni ka wazifa nahin wo chale rasta dekh kar

wo to aazad hai misl-e-mauj-e-saba rakhna raushan diya

raat kaisi bhi ho KHauf ke chor ki ghat kaisi bhi ho

apni ummid ka apne wishwas ka rakhna raushan diya

shab ki be-ant zulmat se laD sakti hai ek nannhi si lau

rah bhule huon ko hai bang-e-dara rakhna raushan diya

aashna ki sada ghup-andhere mein ban jati hai raushni

is shab-e-tar mein apni aawaz ka rakhna raushan diya

raushni ki shariat mein roz-e-azal se yahi darj hai

jot se jot jalti rahegi sada rakhna raushan diya

mujh se 'amjad' kaha jhilmilate hue aKHtar-e-sham ne

us ko aana hi hai wo zarur aaega rakhna raushan diya