کچھ تو فغاں کا خیر بہانہ ہی ہوتا ہے

کچھ تو فغاں کا خیر بہانہ ہی ہوتا ہے

کچھ کم سماعتوں کو سنانا بھی ہوتا ہے

دیکھو ہمارے چاک گریباں پہ خوش نہ ہو

یہ ہے جنوں اور اس کا نشانہ بھی ہوتا ہے

آزادگاں کو خانہ خرابی کا کیا ملال

کیا موج گل کا کوئی ٹھکانہ بھی ہوتا ہے

ہم اس جگہ میں خوش ہیں کہ ایسے خرابوں میں

سانپوں کے ساتھ ساتھ خزانہ بھی ہوتا ہے

میں کیوں ڈروں کہ جان سے جاتا ہوں ایک بار

دشمن کو میرے لوٹ کے آنا بھی ہوتا ہے

اب آپ لوگ سود و زیاں سوچتے رہیں

بندہ تو چوتھی سمت روانہ بھی ہوتا ہے