kya jald din bahaar ke ya-rab guzar gae

kyā jald din bahār ke yā-rab guzar ga.e

bijlī havā se pūchh rahī hai kidhar ga.e

shāyad isī ġharaz se chaḌhe the nigāh par

vo raah pā ke aañkh se dil meñ utar ga.e

va.ade kā naam lab pe na aa.e payām-bar

kahnā faqat yahī ki bahut din guzar ga.e

achchhoñ kā hai bigāḌ bhī behtar banāv se

bikhre to aur bhī tire gesū sañvar ga.e

ik jalva-gāh-e-husn thī mahshar na thā 'jalīl'

kyā kyā hasīñ hamārī nazar se guzar ga.e

kya jald din bahaar ke ya-rab guzar gae

bijli hawa se puchh rahi hai kidhar gae

shayad isi gharaz se chaDhe the nigah par

wo rah pa ke aankh se dil mein utar gae

wade ka nam lab pe na aae payam-bar

kahna faqat yahi ki bahut din guzar gae

achchhon ka hai bigaD bhi behtar banaw se

bikhre to aur bhi tere gesu sanwar gae

ek jalwa-gah-e-husn thi mahshar na tha 'jalil'

kya kya hasin hamari nazar se guzar gae