لب ترستے ہیں تبسم کو اک زمانے سے

لب ترستے ہیں تبسم کو اک زمانے سے

درد دل کم نہیں ہوتا ہے مسکرانے سے

امتحاں عشق میں ہم نے تو کئی بار دئے

فرق پڑتا نہیں کچھ ان کے ستم ڈھانے سے

وحشت عشق میں دیوانے فنا ہوتے ہیں

یہ سبق ملتا ہے پروانوں کے جل جانے سے

دل بہل جائے گا تنہائی میں باتیں کر کے

جا کے اک بت تو اٹھا لاؤ صنم خانے سے

ہو گیا خاک نشیمن تو یہ بادل آئے

فائدہ کچھ نہیں اب کالی گھٹا چھانے سے

اے ثمرؔ چپ رہو مت چھیڑو یہاں ذکر وفا

راز کھل جائے نہ اشکوں کے نکل جانے سے