log kahen diwana tujhko tu samjhe tu dana hai

log kaheñ dīvānā tujh ko tū samjhe tū daanā hai

yā to 'sadā' tū pāgal hai yā duniyā pāgal-ḳhāna hai

ḳhud chāhe samjheñ na samjheñ auroñ ko samjhānā hai

baañT rahā hai gyaan jagat ko ḳhud se jo an-jānā hai

mandir masjid donoñ meñ se kuchh bhī chunñā mushkil thā

shukr ḳhudā kā mai-ḳhvāroñ ne DhūñDh liyā mai-ḳhāna hai

jag hai māyā-jāl piyāre kah ga.e piir faqīr gurū

ye dhokā par baarī baarī har bande ko khānā hai

kis ko koseñ kis ko ro.eñ har jug meñ hai huā yahī

sach ko suulī jhuuT ko jhūmar ye dastūr purānā hai

court kachahrī meñ kyā hogā kaun likhegā rapaT yahāñ

jis ne qatl karāyā us kā hākim se yārānā hai

sab ko yahāñ insāf milegā ik din duniyā sudhregī

soch-soch kar aisā hī bas ham ko jī bahlānā hai

shor machāne se logoñ kī badlegī kyā raa.e 'sadā'

aaj talak kisī pāgal ne kyā ḳhud ko pāgal maanā hai

log kahen diwana tujh ko tu samjhe tu dana hai

ya to 'sada' tu pagal hai ya duniya pagal-KHana hai

KHud chahe samjhen na samjhen auron ko samjhana hai

banT raha hai gyan jagat ko KHud se jo an-jaana hai

mandir masjid donon mein se kuchh bhi chunna mushkil tha

shukr KHuda ka mai-KHwaron ne DhunDh liya mai-KHana hai

jag hai maya-jal piyare kah gae pir faqir guru

ye dhoka par bari bari har bande ko khana hai

kis ko kosen kis ko roen har jug mein hai hua yahi

sach ko suli jhuT ko jhumar ye dastur purana hai

court kachahri mein kya hoga kaun likhega rapaT yahan

jis ne qatl karaya us ka hakim se yarana hai

sab ko yahan insaf milega ek din duniya sudhregi

soch-soch kar aisa hi bas hum ko ji bahlana hai

shor machane se logon ki badlegi kya rae 'sada'

aaj talak kisi pagal ne kya KHud ko pagal mana hai