main ashkon ki zabani likh raha hun

maiñ ashkoñ kī zabānī likh rahā huuñ

mohabbat kī kahānī likh rahā huuñ

zamāne kī ravish likhnā hai mujh ko

huā huuñ paanī paanī likh rahā huuñ

varaq mahdūd haiñ arz-o-samā ke

maiñ rab kī mehrbānī likh rahā huuñ

bure vaqtoñ meñ jin ko yaad huuñ maiñ

unhīñ ko ḳhāndānī likh rahā huuñ

ḳhirad kī god meñ baiThā huā maiñ

junūñ kī lan-tarānī likh rahā huuñ

maiñ chaḌh kar maslahat ke parbatoñ par

baḳhīloñ ko bhī daanī likh rahā huuñ

tire baḳhshe hue zaḳhmoñ ko jānāñ

mohabbat kī nishānī likh rahā huuñ

maiñ ḳhvāboñ kī ghanī chhāñv meñ 'fārūq'

tasavvur ke ma'ānī likh rahā huuñ

main ashkon ki zabani likh raha hun

mohabbat ki kahani likh raha hun

zamane ki rawish likhna hai mujh ko

hua hun pani pani likh raha hun

waraq mahdud hain arz-o-sama ke

main rab ki mehrbani likh raha hun

bure waqton mein jin ko yaad hun main

unhin ko KHandani likh raha hun

KHirad ki god mein baiTha hua main

junun ki lan-tarani likh raha hun

main chaDh kar maslahat ke parbaton par

baKHilon ko bhi dani likh raha hun

tere baKHshe hue zaKHmon ko jaanan

mohabbat ki nishani likh raha hun

main KHwabon ki ghani chhanw mein 'faruq'

tasawwur ke ma'ani likh raha hun