main to ek baadal ka TukDa hun uDa le chal mujhe

maiñ to ik bādal kā TukḌā huuñ uḌā le chal mujhe

tū jahāñ chāhe vahāñ mauj-e-havā le chal mujhe

ḳhud hī niile pāniyoñ meñ phir bulā legā koī

sāhiloñ kī ret tak ai naqsh-e-pā le chal mujhe

tujh ko is se kyā maiñ amrit huuñ ki ik paanī kī buuñd

chārāgar sūkhī zabānoñ tak zarā le chal mujhe

kab tak in saḌkoñ pe bhaTkūñgā bagūloñ kī tarah

maiñ bhī kuchh āñkhoñ kī ThanDak huuñ sabā le chal mujhe

ajnabī rastoñ meñ āḳhir dhuul hī detī hai saath

jaane vaale apne dāman se lagā le chal mujhe

band haiñ is shahr-e-nā-pursāñ ke darvāze tamām

ab mire ghar ai mirī maañ kī du'ā le chal mujhe

main to ek baadal ka TukDa hun uDa le chal mujhe

tu jahan chahe wahan mauj-e-hawa le chal mujhe

KHud hi nile paniyon mein phir bula lega koi

sahilon ki ret tak ai naqsh-e-pa le chal mujhe

tujh ko is se kya main amrit hun ki ek pani ki bund

chaaragar sukhi zabanon tak zara le chal mujhe

kab tak in saDkon pe bhaTkunga bagulon ki tarah

main bhi kuchh aankhon ki ThanDak hun saba le chal mujhe

ajnabi raston mein aaKHir dhul hi deti hai sath

jaane wale apne daman se laga le chal mujhe

band hain is shahr-e-na-pursan ke darwaze tamam

ab mere ghar ai meri man ki du'a le chal mujhe