manzil dhuan-dhuan hai Dagar ghair-motabar

manzil dhuāñ-dhuāñ hai Dagar ġhair-mo'tabar

shāyad hai zindagī kā safar ġhair-mo'tabar

lamhoñ kī fauj kā karo DaT kar muqābla

hotā hai be-dilī kā mafar ġhair-mo'tabar

saudāgar-e-zamīr na kar ruuh kā ziyāñ

hai terā jām-e-sūd-o-zarar ġhair-mo'tabar

yuuñ to yugoñ talak koī manzil na pāoge

chhāñTī hai tum ne rāhguzar ġhair-mo'tabar

vo bhī bhaTak rahā hai use bhī milī na raah

dil ġhair-mo'tabar hai nazar ġhair-mo'tabar

pahuñche vahāñ to sirf añdhere khaḌe mile

niklā dayār-e-'ilm-o-ḳhabar ġhair-mo'tabar

samjhe koī ye raaz to haadī batā.ūñ bhī

hai raat be-sabāt sahar ġhair-mo'tabar

manzil dhuan-dhuan hai Dagar ghair-mo'tabar

shayad hai zindagi ka safar ghair-mo'tabar

lamhon ki fauj ka karo DaT kar muqabla

hota hai be-dili ka mafar ghair-mo'tabar

saudagar-e-zamir na kar ruh ka ziyan

hai tera jam-e-sud-o-zarar ghair-mo'tabar

yun to yugon talak koi manzil na paoge

chhanTi hai tum ne rahguzar ghair-mo'tabar

wo bhi bhaTak raha hai use bhi mili na rah

dil ghair-mo'tabar hai nazar ghair-mo'tabar

pahunche wahan to sirf andhere khaDe mile

nikla dayar-e-'ilm-o-KHabar ghair-mo'tabar

samjhe koi ye raaz to hadi bataun bhi

hai raat be-sabaat sahar ghair-mo'tabar