masruf har ghaDi hai jo apni ana ke sath

masrūf har ghaḌī hai jo apnī anā ke saath

kaise mile vo aatmā parmātmā ke saath

har baar kuchh talab bhī hai hamd-o-sanā ke saath

ye bandagī hai yā ki tijārat ḳhudā ke saath

achchhe-bure kā ilm hī tujh ko nahīñ hai jab

mat chheḌ-chhāḌ kar tū ḳhudā kī razā ke saath

maanā tū ai tabīb hai apne hunar meñ taaq

lab pe duā bhī chāhiye dast-e-shifā ke saath

sūraj nahīñ ki Dar ke maiñ bādal meñ jā chhupūñ

dīpak huuñ laḌ marūñgā muḳhālif havā ke saath

tan to qabā hai tan se hai hastī tirī judā

itnā hai kyoñ lagāv purānī qabā ke saath

dair-o-haram ke shor meñ mumkin nahīñ 'sadā'

ḳhalvat meñ chal ke milte haiñ aao ḳhudā ke saath

masruf har ghaDi hai jo apni ana ke sath

kaise mile wo aatma parmatma ke sath

har bar kuchh talab bhi hai hamd-o-sana ke sath

ye bandagi hai ya ki tijarat KHuda ke sath

achchhe-bure ka ilm hi tujh ko nahin hai jab

mat chheD-chhaD kar tu KHuda ki raza ke sath

mana tu ai tabib hai apne hunar mein taq

lab pe dua bhi chahiye dast-e-shifa ke sath

suraj nahin ki Dar ke main baadal mein ja chhupun

dipak hun laD marunga muKHalif hawa ke sath

tan to qaba hai tan se hai hasti teri juda

itna hai kyon lagaw purani qaba ke sath

dair-o-haram ke shor mein mumkin nahin 'sada'

KHalwat mein chal ke milte hain aao KHuda ke sath