maze lun dard ke main thoDe thoDe zulm sah-sah kar

maze luuñ dard ke maiñ thoḌe thoḌe zulm sah-sah kar

sitam kiije to tham tham kar jafā kiije to rah-rah kar

mile the aaj muddat meñ bahut ro.e bahut taḌpe

vo dard-e-ishq sun sun kar ham apnā dard kah-kah kar

huī hai sham-e-mahfil to sharīk-e-girya-e-āshiq

tujhe ai qulqul-e-mīnā kahā thā kis ne qah-qah kar

chhupāyā zulf ne chehra to shoḳhī ne kiyā zāhir

hazāroñ baar niklā vasl kī shab chāñd gah-gah kar

taḌapne meñ maza aatā hai us kam-baḳht ke ham ko

agar dil yaas se baiThā ubhārā ham ne kah-kah kar

ye jaanā thā na ā.eñge to kyoñ jaane diyā un ko

yahī ai 'dāġh' pachhtāvā mujhe aatā hai rah-rah kar

maze lun dard ke main thoDe thoDe zulm sah-sah kar

sitam kije to tham tham kar jafa kije to rah-rah kar

mile the aaj muddat mein bahut roe bahut taDpe

wo dard-e-ishq sun sun kar hum apna dard kah-kah kar

hui hai sham-e-mahfil to sharik-e-girya-e-ashiq

tujhe ai qulqul-e-mina kaha tha kis ne qah-qah kar

chhupaya zulf ne chehra to shoKHi ne kiya zahir

hazaron bar nikla wasl ki shab chand gah-gah kar

taDapne mein maza aata hai us kam-baKHt ke hum ko

agar dil yas se baiTha ubhaara hum ne kah-kah kar

ye jaana tha na aaenge to kyon jaane diya un ko

yahi ai 'dagh' pachhtawa mujhe aata hai rah-rah kar