mere hi dam se mehr-o-wafa ka nishan hai ab

mere hī dam se mehr-o-vafā kā nishāñ hai ab

tujh sā agar nahīñ hai to mujh sā kahāñ hai ab

is haal ko pahuñch ga.iiñ dil kī ḳharābiyāñ

terā makāñ hai ab na ḳhudā kā makāñ hai ab

jaatī hai aadhī raat magar is kā kyā javāb

ghabrā ke vo ye kahte haiñ vaqt-e-azāñ hai ab

siine se mere dast-e-tasallī uThā.iye

ye bhī dil-e-nahīf ko bār-e-garāñ hai ab

dekho zarā sī sharm ne sab kuchh miTā diyā

vo aañkh vo nigāh vo chitvan kahāñ hai ab

kyā lutf-e-dostī ki nahīñ lutf-e-dushmanī

dushman ko bhī jo dekhiye puurā kahāñ hai ab

tum ko yaqīñ nahīñ to na ho is kā kyā ilaaj

kam-baḳht 'dāġh' tum se bahut bad-gumāñ hai ab

mere hi dam se mehr-o-wafa ka nishan hai ab

tujh sa agar nahin hai to mujh sa kahan hai ab

is haal ko pahunch gain dil ki KHarabiyan

tera makan hai ab na KHuda ka makan hai ab

jati hai aadhi raat magar is ka kya jawab

ghabra ke wo ye kahte hain waqt-e-azan hai ab

sine se mere dast-e-tasalli uThaiye

ye bhi dil-e-nahif ko bar-e-garan hai ab

dekho zara si sharm ne sab kuchh miTa diya

wo aankh wo nigah wo chitwan kahan hai ab

kya lutf-e-dosti ki nahin lutf-e-dushmani

dushman ko bhi jo dekhiye pura kahan hai ab

tum ko yaqin nahin to na ho is ka kya ilaj

kam-baKHt 'dagh' tum se bahut bad-guman hai ab