میرے ہونے نہ ہونے میں نہ تھا کچھ بھی مگر پھر بھی

میرے ہونے نہ ہونے میں نہ تھا کچھ بھی مگر پھر بھی

نہ جانے کیوں ہوا تخلیق بے قیمت بشر پھر بھی

ہوا کی پشت پہ تاروں بھری وسعت میں ہو آیا

مگر اک قلب کی گہرائیوں سے بے خبر پھر بھی

دھماکوں کی صدا سے گونجتی ہے یہ زمیں ہر پل

قلم کی نیم بسمل آہ شب ہے بے اثر پھر بھی

اگرچہ خاک مستقبل کا ہر امکان رکھتی ہے

چراغوں کے مقدر میں نہیں ہوتی سحر پھر بھی

ہماری دوستی کا بج رہا ہے شہر میں ڈنکا

مرا دل آبلہ پھر بھی تری ضد نیشتر پھر بھی