meri basti ki koi tishna-dahani dekhe

merī bastī kī koī tishna-dahānī dekhe

muddateñ guzrīñ kisī aañkh meñ paanī dekhe

jaag jaa.e to bulā letā hai sahrā us ko

so.e to ḳhvāb meñ dariyā kī ravānī dekhe

aa gayā ghar to mujhe jaanā hai bistar kī taraf

ab kise taab ki ye hijrat-e-sānī dekhe

ik tabassum se koī 'umr guzāre kaise

kab talak tark-e-ta'alluq kī nishānī dekhe

mere alfāz ne ījād kiyā hai us ko

jo bhī dekhe use ab merī zabānī dekhe

meri basti ki koi tishna-dahani dekhe

muddaten guzrin kisi aankh mein pani dekhe

jag jae to bula leta hai sahra us ko

soe to KHwab mein dariya ki rawani dekhe

aa gaya ghar to mujhe jaana hai bistar ki taraf

ab kise tab ki ye hijrat-e-sani dekhe

ek tabassum se koi 'umr guzare kaise

kab talak tark-e-ta'alluq ki nishani dekhe

mere alfaz ne ijad kiya hai us ko

jo bhi dekhe use ab meri zabani dekhe