mizhgan hain ghazab abru-e-KHamdar ke aage

mizhgāñ haiñ ġhazab abrū-e-ḳhamdār ke aage

ye tiir baras paḌte haiñ talvār ke aage

ḳhair us meñ hai vaa.iz ki kabhī mai kī mazammat

karnā na kisī rind-e-ḳhush-atvār ke aage

kahnā mirī bālīñ pe ki āsār bure haiñ

kartā hai ye bāteñ koī bīmār ke aage

shikve the bahut un se shikāyat thī bahut kuchh

sab bhuul ga.e vasl kī shab pyaar ke aage

ḳhalvat meñ jo pūchho to kahūñ dil kī haqīqat

mujh se na mirā haal suno chaar ke aage

ā.īna abhī dekh ke ḳhud-bīñ to vo ho leñ

ḳhud ā.eñge phir tālib-e-dīdār ke aage

qārūñ kā ḳhazāna ho ki hātim kī saḳhāvat

sab kuchh hai magar kuchh nahīñ mai-ḳhvār ke aage

kyā mujh ko Darā.eñgī tirī tez nigāheñ

ye aañkh jhapaktī nahīñ talvār ke aage

dīvānoñ meñ dīvāne 'hafīz' aap haiñ varna

hushiyār se hushiyār haiñ hushiyār ke aage

mizhgan hain ghazab abru-e-KHamdar ke aage

ye tir baras paDte hain talwar ke aage

KHair us mein hai waiz ki kabhi mai ki mazammat

karna na kisi rind-e-KHush-atwar ke aage

kahna meri baalin pe ki aasar bure hain

karta hai ye baaten koi bimar ke aage

shikwe the bahut un se shikayat thi bahut kuchh

sab bhul gae wasl ki shab pyar ke aage

KHalwat mein jo puchho to kahun dil ki haqiqat

mujh se na mera haal suno chaar ke aage

aaina abhi dekh ke KHud-bin to wo ho len

KHud aaenge phir talib-e-didar ke aage

qarun ka KHazana ho ki hatim ki saKHawat

sab kuchh hai magar kuchh nahin mai-KHwar ke aage

kya mujh ko Daraengi teri tez nigahen

ye aankh jhapakti nahin talwar ke aage

diwanon mein diwane 'hafiz' aap hain warna

hushiyar se hushiyar hain hushiyar ke aage