مدعی خوش کہ ہے وہ مرد یگانہ پیدا

مدعی خوش کہ ہے وہ مرد یگانہ پیدا

اور ہمیں چاہ کرے ہم سا زمانہ پیدا

ہر فسانے میں حقیقت کا کوئی شائبہ ہے

ہر حقیقت سے بالآخر ہے فسانہ پیدا

ہر جواں قلب کسی شوخ نظر کی زد میں

یہ وہ نخچیر کرے آپ نشانہ پیدا

آنکھ کے وصف سے بھی حسن نمایاں ہے مگر

عشق کے دم سے تو ہے آئنہ خانہ پیدا

ہو مقدر میں اگر حسن طبیعت کا صلہ

آپ کر لیتے ہیں حالات بہانہ پیدا

طائر شوق ہما وہ جو کرے بال کشا

ہو بیابان لق و دق میں خزانہ پیدا