مجھے دل کے ارماں سے فرصت نہیں

مجھے دل کے ارماں سے فرصت نہیں

یہی اب مصیبت ہے راحت نہیں

تری آرزو سے تو ہوں بے امید

تجھے بھول جاؤں یہ قدرت نہیں

انہیں ناز ہے حسن پر اپنے یوں

کہ ان سے سوا خوبصورت نہیں

ملے وہ نہ مجھ کو تو کیا ہو گیا

خدا جانتا ہے کہ حسرت نہیں

محبت میں سب ہی پریشاں رہے

یہ سن کر انہیں تم سے الفت نہیں

وہ وعدے پہ اپنے نہ آئے کبھی

یہی ان کی عادت ہے غفلت نہیں

وہاں خود نہ جانا اے باصرؔ کبھی

کہ محبوب کے در پہ عزت نہیں