musibaten to uTha kar baDi baDi bhule

musībateñ to uThā kar baḌī baḌī bhūle

magar firāq kī iizā na ik ghaḌī bhūle

na hogī us lab-e-rañgīñ kī āb-o-tāb nasīb

na apne rañg pe phūloñ kī pañkhuḌī bhūle

kisī ne pyaar se bāheñ gale meñ Daal jo diiñ

tamām hijr ke sadme ham us ghaḌī bhūle

abhī vo yaad haiñ sāmāñ hameñ asīrī ke

abhī na tauq na beḌī na hathkaḌī bhūle

tumheñ jo dekh liyā ġham ġhalat huā apnā

tumheñ jo pā ga.e sab rañj us ghaḌī bhūle

burī balā hai ye chashm-e-siyāh kī gardish

use jo dekh le aahū to chaukḌī bhūle

girī thī shaiḳh kī tasbīh mai-kade meñ raat

ḳhabar nahīñ ki kahāñ nashshe meñ chhaḌī bhūle

'hafīz' vo dam-e-ruḳhsat ye kahte jaate haiñ

ki merī yaad na dil se koī ghaḌī bhūle

musibaten to uTha kar baDi baDi bhule

magar firaq ki iza na ek ghaDi bhule

na hogi us lab-e-rangin ki aab-o-tab nasib

na apne rang pe phulon ki pankhuDi bhule

kisi ne pyar se bahen gale mein Dal jo din

tamam hijr ke sadme hum us ghaDi bhule

abhi wo yaad hain saman hamein asiri ke

abhi na tauq na beDi na hathkaDi bhule

tumhein jo dekh liya gham ghalat hua apna

tumhein jo pa gae sab ranj us ghaDi bhule

buri bala hai ye chashm-e-siyah ki gardish

use jo dekh le aahu to chaukDi bhule

giri thi shaiKH ki tasbih mai-kade mein raat

KHabar nahin ki kahan nashshe mein chhaDi bhule

'hafiz' wo dam-e-ruKHsat ye kahte jate hain

ki meri yaad na dil se koi ghaDi bhule