na baha paun jo aansu bhi bahana chahun

na bahā pā.ūñ jo aañsū bhī bahānā chāhūñ

apne hī dard kī tasvīr banānā chāhūñ

ajnabī ban ke mire ġham ne sadā dī hai mujhe

yuuñ to har shaḳhs kā ġham dil meñ chhupānā chāhūñ

kitnā be-rang hai mausam kā ye dhuñdlā chehra

apnī yādoñ ke charāġhoñ ko bujhānā chāhūñ

dhuup ban kar jo mirī chhāñv meñ rahtā thā kabhī

dil ke ā.īne se vo aks miTānā chāhūñ

dasht-e-dil meñ hī kahīñ dafn hai ummīd kī laash

apne ash.ār meñ ye bhed chhupānā chāhūñ

darmiyāñ sab ke jo phailī hai vo duurī huuñ 'bahār'

sab kī duurī ko gale apne lagānā chāhūñ

na baha paun jo aansu bhi bahana chahun

apne hi dard ki taswir banana chahun

ajnabi ban ke mere gham ne sada di hai mujhe

yun to har shaKHs ka gham dil mein chhupana chahun

kitna be-rang hai mausam ka ye dhundla chehra

apni yaadon ke charaghon ko bujhana chahun

dhup ban kar jo meri chhanw mein rahta tha kabhi

dil ke aaine se wo aks miTana chahun

dasht-e-dil mein hi kahin dafn hai ummid ki lash

apne ashaar mein ye bhed chhupana chahun

darmiyan sab ke jo phaili hai wo duri hun 'bahaar'

sab ki duri ko gale apne lagana chahun