نا تو پستے ہی سے رغبت ہے نا بادام سے شوق

نا تو پستے ہی سے رغبت ہے نا بادام سے شوق

ہے مگر چشم و لب و ساقی و گلفام سے شوق

جو گرفتار ہیں اس زلف مسلسل کے سنا

نا انہیں کام قفس سے ہے نا کچھ دام سے شوق

کون سا ہووے گا کمبخت وہ عاشق جس کو

ہوگا فرقت میں دل آرام کے آرام سے شوق

مثل آئینہ تکے گا تری صورت کو مدام

یہ تو جانے کا نہیں اس دل ناکام سے شوق

پھاڑ کر خط کو وہ کہنے لگے قاصد سے مجھے

ابے سنتا ہے نہیں نامہ و پیغام سے شوق

اس توقع پہ کہ شاید وہ سحر کو نکلے

گھر سے باہر لیے پھرتا ہے سر شام سے شوق

زلف اس رخ پہ چھٹی رہتی ہے حیران ہے عقل

کیوں نا حیران ہو ہندو کو اور اسلام سے شوق

پھرنا اس کوچے میں یا پلکوں سے جھاڑو دینی

رات دن ہم کو ہے اے عیشؔ اسی کام سے شوق