na ye mumkin ki apne dard ko tahlil kar dun

na ye mumkin ki apne dard ko tahlīl kar duuñ

na ye mumkin ki us bedard ko tabdīl kar duuñ

maiñ āñkhoñ meñ ik aisī niiñd laanā chāhtā huuñ

jise dekhūñ use ik ḳhvāb meñ tabdīl kar duuñ

ye saarā shahr aap apnī havā meñ hī bikhar jaa.e

agar apnī taraf se maiñ zarā sī Dhiil kar duuñ

mujhe tanhā.ī ne itnā ziyāda kar diyā hai

jahāñ chāhūñ vahīñ ik anjuman tashkīl kar duuñ

mire bas meñ nahīñ hai varna tā-roz-e-qayāmat

maiñ is duniyā ke daftar meñ abhī tā'tīl kar duuñ

abhī mas hī hue haiñ tere hoñThoñ se mire hoñTh

ijāzat ho to is ijmāl kī tafsīl kar duuñ

na ye mumkin ki apne dard ko tahlil kar dun

na ye mumkin ki us bedard ko tabdil kar dun

main aankhon mein ek aisi nind lana chahta hun

jise dekhun use ek KHwab mein tabdil kar dun

ye sara shahr aap apni hawa mein hi bikhar jae

agar apni taraf se main zara si Dhil kar dun

mujhe tanhai ne itna ziyaada kar diya hai

jahan chahun wahin ek anjuman tashkil kar dun

mere bas mein nahin hai warna ta-roz-e-qayamat

main is duniya ke daftar mein abhi ta'til kar dun

abhi mas hi hue hain tere honThon se mere honTh

ijazat ho to is ijmal ki tafsil kar dun