نہ یہ ممکن کہ اپنے درد کو تحلیل کر دوں

نہ یہ ممکن کہ اپنے درد کو تحلیل کر دوں

نہ یہ ممکن کہ اس بے درد کو تبدیل کر دوں

میں آنکھوں میں اک ایسی نیند لانا چاہتا ہوں

جسے دیکھوں اسے اک خواب میں تبدیل کر دوں

یہ سارا شہر آپ اپنی ہوا میں ہی بکھر جائے

اگر اپنی طرف سے میں ذرا سی ڈھیل کر دوں

مجھے تنہائی نے اتنا زیادہ کر دیا ہے

جہاں چاہوں وہیں اک انجمن تشکیل کر دوں

مرے بس میں نہیں ہے ورنہ تا روز قیامت

میں اس دنیا کے دفتر میں ابھی تعطیل کر دوں

ابھی مس ہی ہوئے ہیں تیرے ہونٹھوں سے مرے ہونٹھ

اجازت ہو تو اس اجمال کی تفصیل کر دوں