نالہ کن ہجر کی شب کو دل ناساز نہیں

نالہ کن ہجر کی شب کو دل ناساز نہیں

کیوں بلند اب مرے بیمار کی آواز نہیں

گر مزاج آج کسی شوخ کا ناساز نہیں

کسی لئے بزم میں پھر چنگ کی آواز نہیں

تڑپ اتنی نہیں تیزی نہیں آواز نہیں

برق میں بھی دل بیتاب کا انداز نہیں

چپکے چپکے کیا دل ناوک مژگاں سے ہدف

ہے تعجب کہ پر تیر کی آواز نہیں

دل تڑپتا ہے مرا طائر بسمل کی طرح

روح قالب میں نہیں طاقت پرواز نہیں

واعظوں کا یہ نہیں قول دروغ اے رندو

حشر نزدیک ہے یہ دور کی آواز نہیں

ارنی میں جو کہوں جلوہ نظر آئے کلیم

لن ترانی کی مرے واسطے آواز نہیں

طائر قبلہ نما کہتا ہے مضطر ہو کر

مرغ بسمل کی طرح طاقت پرواز نہیں

گرد باد اٹھ کے مری خاک کا یہ کہتا ہے

خاکساروں میں کوئی مجھ سا سرافراز نہیں

دار پر چڑھ کے یہ منصور صدا دیتا ہے

آج مجھ سا کوئی عالم میں سرافراز نہیں

اس مرے دل کا اڑا دے جو نشانہ کوئی

دہر میں کیا کوئی ایسا قدر انداز نہیں

گل و بلبل کو جدا باغ سے کر دیتا ہے

تجھ سا صیاد کوئی تفرقہ انداز نہیں

پھونک دیتیں تو یہ صیاد کا گھر نالوں سے

عندلیبوں کی مگر شعلۂ آواز نہیں

سیکڑوں عاشق و معشوق چھڑائے تو نے

اے اجل تجھ سا کوئی تفرقہ انداز نہیں

بادہ خواروں پہ گھٹا غم کی نہ کیوں کر چھائے

دل کھلے کیا در مے خانہ اگر باز نہیں

بند ہو ہو گئیں یوں بلبل دل سے میری

عندلیبان چمن زمزمہ پرداز نہیں

جس طرح جان بچائی مئے وصلت نے مری

پر اثر ایسا کوئی شربت اعجاز نہیں

قبر میں کیوں نہ اکیلے مرا جی گھبرائے

کوئی مونس نہیں یاور نہیں دم ساز نہیں

پار ناوک نہ ہوا توڑ کے دل کو میرے

زور بازو میں ترے او قدر انداز نہیں

کاٹتا کیوں ہے تو قینچی سے اسے اے صیاد

پر جو دو چار ہیں یہ قابل پرواز نہیں

قبر پر آ کے بھی دل پیسنے آئے ہو مرا

پاؤں رکھنے کا لحد پر تو یہ انداز نہیں

صورت اشک مگر اہل عدم جاتے ہیں

ہے رواں قافلہ پر زنگ کی آواز نہیں

باغ ویران کیا باد خزاں نے ایسا

ہم صفیران چمن کی کہیں آواز نہیں

ہو گئی بند زباں جلد خبر لے عیسیٰ

ہچکیوں کی ترے بیمار میں آواز نہیں

سرد آہوں سے ہو کیا سر محبت ظاہر

بوئے غنچہ کی طرح دل میں مرے راز نہیں

اس طرح کفر کی عالم میں ہوئی ہے کثرت

مسجدوں تک میں اذانوں کی بھی آواز نہیں

آج کیا مر گئے زنداں میں تمہارے قیدی

خیر ہو کیوں غل و زنجیر کی آواز نہیں

دور ہے مہدیٔ دیں کا جو جہان میں فاخرؔ

بت کدوں میں کہیں ناقوس کی آواز نہیں