naznin jin ke kuchh niyaz nahin

nāznīñ jin ke kuchh niyāz nahīñ

in hasīnoñ se dil ko saaz nahīñ

ġhair kā bhed kyuuñ na khul jaa.e

aap ke dil kā to vo raaz nahīñ

ik tirī zaat ke sivā zāhid

koī duniyā meñ pāk-bāz nahīñ

is meñ paatā huuñ kuchh tirī ḳhūbī

mujh ko be-vaj.h dil pe naaz nahīñ

jitne haiñ ahl-e-dard haiñ hamdard

dil vo patthar hai jo gudāz nahīñ

kah rahī hai ye sādgī kī adā

nek-o-bad meñ kuchh imtiyāz nahīñ

jubba-sā.ī butoñ ke dar kī 'hafīz'

zāhid-e-ḳhushk kī namāz nahīñ

naznin jin ke kuchh niyaz nahin

in hasinon se dil ko saz nahin

ghair ka bhed kyun na khul jae

aap ke dil ka to wo raaz nahin

ek teri zat ke siwa zahid

koi duniya mein pak-baz nahin

is mein pata hun kuchh teri KHubi

mujh ko be-wajh dil pe naz nahin

jitne hain ahl-e-dard hain hamdard

dil wo patthar hai jo gudaz nahin

kah rahi hai ye sadgi ki ada

nek-o-bad mein kuchh imtiyaz nahin

jubba-sai buton ke dar ki 'hafiz'

zahid-e-KHushk ki namaz nahin