نفس نفس میں ہر ایک پل انتشار سا کچھ

نفس نفس میں ہر ایک پل انتشار سا کچھ

لہو کی بارود میں دھرا ہے شرار سا کچھ

تجھے میں چھو چھو کے اپنی مٹی بسا رہا ہوں

اب آ رہا ہے ذرا ذرا اعتبار سا کچھ

ہماری بستی میں کون پھر معتبر رہے گا

کہ آئنوں میں اتر رہا ہے غبار سا کچھ

اندھیری شب میں چراغ سا جل رہی ہے میت

رگوں میں شاید کہ رہ گیا ہے شرار سا کچھ

میں ایک ہی کیا وہاں سبھی زار زار روئے

وہ کھوئی کھوئی بجا رہی تھی ستار سا کچھ

چراغ ہاتھوں میں لے کے جل ناریاں چلی ہیں

تہ سمندر دکھائی دیوے دیار سا کچھ