naya khila hai shagufa koi bahaar mein kya

nayā khilā hai shagūfa koī bahār meñ kyā

guñdhā huā hai mirā dil kisī ke haar meñ kyā

uḌāne phuul hasīñ aa.e haiñ bahār meñ kyā

lagī hai aag sī ye aaj lāla-zār meñ kyā

kisī se kahne ye aa.e haiñ vo sahar hote

tamām-rāt kaTī mere intizār meñ kyā

tumhāre ḳhaal kā bosa nahīñ hai gintī meñ

zarā sī chiiz hai aa.egī ye shumār meñ kyā

utaar lī sar-e-bāzār jis ne ruḳh se naqāb

hijāb aa.e use sau maiñ kyā hazār meñ kyā

ye surma chashm-e-adū ke liye uThā rakkheñ

vo ḳhaak Dālte haiñ chashm-e-etibār meñ kyā

banā.eñge dil-e-pur-dāġh jam.a kar ke unheñ

chamakte dekhe haiñ zarre mire ġhubār meñ kyā

ye mere dosh se hote nahīñ judā dam-e-naz.a

gaḌeñge mere farishte mire mazār meñ kyā

hai intizār ki mai-nosh ḳhum liye pahuñcheñ

ghirī haiñ kal se ghaTā.eñ ye sabza-zār meñ kyā

jo dekhe saañp ke kaaTe kī lahr use aa.e

bharā hai zahr ab aisā bhī zulf-e-yār meñ kyā

sharāb se bhī sivā ḳhush-gavār hai ham ko

batā.eñ kyā ki mazā paḌ gayā udhār meñ kyā

kanār-e-shauq meñ aa kar hasīñ nikal na sake

asar ḳhudā ne diyā hai hamāre pyaar meñ kyā

'riyāz' tauba karo din ḳhizāñ ke aa.e haiñ

tum aa.e piine ko jaatī huī bahār meñ kyā

naya khila hai shagufa koi bahaar mein kya

gundha hua hai mera dil kisi ke haar mein kya

uDane phul hasin aae hain bahaar mein kya

lagi hai aag si ye aaj lala-zar mein kya

kisi se kahne ye aae hain wo sahar hote

tamam-raat kaTi mere intizar mein kya

tumhaare KHal ka bosa nahin hai ginti mein

zara si chiz hai aaegi ye shumar mein kya

utar li sar-e-bazar jis ne ruKH se naqab

hijab aae use sau main kya hazar mein kya

ye surma chashm-e-adu ke liye uTha rakkhen

wo KHak Dalte hain chashm-e-etibar mein kya

banaenge dil-e-pur-dagh jama kar ke unhen

chamakte dekhe hain zarre mere ghubar mein kya

ye mere dosh se hote nahin juda dam-e-naza

gaDenge mere farishte mere mazar mein kya

hai intizar ki mai-nosh KHum liye pahunchen

ghiri hain kal se ghaTaen ye sabza-zar mein kya

jo dekhe sanp ke kaTe ki lahr use aae

bhara hai zahr ab aisa bhi zulf-e-yar mein kya

sharab se bhi siwa KHush-gawar hai hum ko

bataen kya ki maza paD gaya udhaar mein kya

kanar-e-shauq mein aa kar hasin nikal na sake

asar KHuda ne diya hai hamare pyar mein kya

'riyaz' tauba karo din KHizan ke aae hain

tum aae pine ko jati hui bahaar mein kya