pahle bhi sahe hain ranj bahut par aisi ghaDi kab aai hai

pahle bhī sahe haiñ ranj bahut par aisī ghaḌī kab aa.ī hai

kitnī kaalī kaalī rāteñ kitnī kaḌī tanhā.ī hai

mere man ke sāgar meñ Duubo to shāyad jaan sako

jo jo aañsū maiñ ne piye haiñ un meñ kyā gahrā.ī hai

mujh ko mere haal pe chhoḌo jo biitī so biit ga.ī

duniyā-bhar se kaun kahe ye ġham kī baḌī rusvā.ī hai

kis kis taur zamāne-bhar ke ham ne kachoke khaa.e haiñ

tum bhī sun kar rone lage yaañ hañs hañs 'umr bitā.ī hai

ham be-parvā 'āshiq tere ham ġham-e-daurāñ ko kyā jāneñ

jis ke kāran tujh ko chhoḌā haañ us ġham kī duhā.ī hai

jal jal kar ham ḳhaak hue tab jā ke nigāheñ Thahrī haiñ

haa.e vo jism-e-nāz ki jis meñ ā.īne kī safā.ī hai

jin galiyoñ meñ 'āzmī' sāhab aap bahut badnām hue

phir bhī aap vahīñ jaate haiñ is meñ kyā dānā.ī hai

pahle bhi sahe hain ranj bahut par aisi ghaDi kab aai hai

kitni kali kali raaten kitni kaDi tanhai hai

mere man ke sagar mein Dubo to shayad jaan sako

jo jo aansu main ne piye hain un mein kya gahrai hai

mujh ko mere haal pe chhoDo jo biti so bit gai

duniya-bhar se kaun kahe ye gham ki baDi ruswai hai

kis kis taur zamane-bhar ke hum ne kachoke khae hain

tum bhi sun kar rone lage yan hans hans 'umr bitai hai

hum be-parwa 'ashiq tere hum gham-e-dauran ko kya jaanen

jis ke karan tujh ko chhoDa han us gham ki duhai hai

jal jal kar hum KHak hue tab ja ke nigahen Thahri hain

hae wo jism-e-naz ki jis mein aaine ki safai hai

jin galiyon mein 'azmi' sahab aap bahut badnam hue

phir bhi aap wahin jate hain is mein kya danai hai