پتہ ہے آشنا دنیا ہے تم سے

پتہ ہے آشنا دنیا ہے تم سے

مگر میرا بھی کچھ رشتہ ہے تم سے

نمی سی آنکھ میں رہتی ہے ہر دم

یہ صحرا آج بھی دریا ہے تم سے

نگاہوں سے کبھی اوجھل نہ ہونا

کوئی اپنی خبر رکھتا ہے تم سے

بہت مقبول ہیں کچھ جھوٹ میرے

انہیں میں ایک وابستہ ہے تم سے

کہو لب سے اگر انکار بھی ہے

مجھے شاید یہی سننا ہے تم سے

ذرا سا پیار ہی تو چاہتا ہوں

بتاؤ اور کیا جھگڑا ہے تم سے

بھروسہ اٹھ گیا لفظوں سے میرا

مجھے اب کچھ نہیں کہنا ہے تم سے