purane ghar mein naya ghar basana chahta hai

purāne ghar meñ nayā ghar basānā chāhtā hai

vo sūkhe phuul meñ ḳhushbū jagānā chāhtā hai

na jaane kyuuñ tire ma.asūm jhuuT ko āḳhir

zamāna sach kī tarah āzmānā chāhtā hai

abhī tapās se niklā nahīñ tirā sādhū

ki phir se ik na.ī dhūnī ramānā chāhtā hai

ye āb-dīda Thahar jaa.e jhiil kī sūrat

ki ek chāñd kā TukḌā nahānā chāhtā hai

ḳhud apnī aañkh meñ paanī utārne vaalā

hamārī aañkh ko sahrā banānā chāhtā hai

tujhe to bāñdh ke rakkhā hai nīstī ne 'shahāb'

tū hai ki hadd-e-fusūñ ko miTānā chāhtā hai

purane ghar mein naya ghar basana chahta hai

wo sukhe phul mein KHushbu jagana chahta hai

na jaane kyun tere masum jhuT ko aaKHir

zamana sach ki tarah aazmana chahta hai

abhi tapas se nikla nahin tera sadhu

ki phir se ek nai dhuni ramana chahta hai

ye aab-dida Thahar jae jhil ki surat

ki ek chand ka TukDa nahana chahta hai

KHud apni aankh mein pani utarne wala

hamari aankh ko sahra banana chahta hai

tujhe to bandh ke rakkha hai nisti ne 'shahab'

tu hai ki hadd-e-fusun ko miTana chahta hai