qafile se bhaTak chuka hun main

qāfile se bhaTak chukā huuñ maiñ

ab faqat raah dekhtā huuñ maiñ

jis kā hal hī nahīñ kisī ke paas

yuuñ samajh le vo mas.ala huuñ maiñ

tere dil meñ qiyām thā merā

kaise ashkoñ meñ bah gayā huuñ maiñ

merā maskan to ye azal se na thā

jis jazīre pe rah rahā huuñ maiñ

ālam-e-vasl bhī hai yaad mujhe

furqatoñ se bhī āshnā huuñ maiñ

saarā lashkar hī ro rahā hai mujhe

kaisā dil-soz ma.arka huuñ maiñ

naav tūfāñ kī zad meñ hai 'jāmī'

aur akelā hī bach gayā huuñ maiñ

qafile se bhaTak chuka hun main

ab faqat rah dekhta hun main

jis ka hal hi nahin kisi ke pas

yun samajh le wo masala hun main

tere dil mein qiyam tha mera

kaise ashkon mein bah gaya hun main

mera maskan to ye azal se na tha

jis jazire pe rah raha hun main

aalam-e-wasl bhi hai yaad mujhe

furqaton se bhi aashna hun main

sara lashkar hi ro raha hai mujhe

kaisa dil-soz marka hun main

naw tufan ki zad mein hai 'jami'

aur akela hi bach gaya hun main