rah-e-sitam mein soz-e-jigar kaise chhoD den

rāh-e-sitam meñ soz-e-jigar kaise chhoḌ deñ

lambā safar hai zād-e-safar kaise chhoḌ deñ

āñdhī meñ chhoḌte haiñ kahīñ āshiyāñ parind

ham is havā ke ḳhauf se ghar kaise chhoḌ deñ

chandan ke ban meñ saañp nikalte hī rahte haiñ

is Dar se ḳhushbuoñ ke shajar kaise chhoḌ deñ

jab kuchh na thā to ham ne diyā thā zamīñ ko ḳhuuñ

ab fasl pak chukī to samar kaise chhoḌ deñ

ai dil vo dekh ḳhema-e-fardā qarīb hai

tujh ko fasīl-e-shab ke idhar kaise chhoḌ deñ

maanā ki ek 'umr se Thahrī huī hai raat

insān haiñ umīd-e-sahar kaise chhoḌ deñ

rah-e-sitam mein soz-e-jigar kaise chhoD den

lamba safar hai zad-e-safar kaise chhoD den

aandhi mein chhoDte hain kahin aashiyan parind

hum is hawa ke KHauf se ghar kaise chhoD den

chandan ke ban mein sanp nikalte hi rahte hain

is Dar se KHushbuon ke shajar kaise chhoD den

jab kuchh na tha to hum ne diya tha zamin ko KHun

ab fasl pak chuki to samar kaise chhoD den

ai dil wo dekh KHema-e-farda qarib hai

tujh ko fasil-e-shab ke idhar kaise chhoD den

mana ki ek 'umr se Thahri hui hai raat

insan hain umid-e-sahar kaise chhoD den