rah sunsan kaDi dhup pighalte sae

raah sunsān kaḌī dhuup pighalte saa.e

jism se lipTī huī ruuh kahāñ tak jaa.e

shaam tak phir mire qadmoñ meñ giregā sūraj

din meñ kitnī hī bulandī pe ye par phailā.e

sang-rezoñ pe utartī hai kiran kī devī

rang kohsār ke mukhḌe kā nikhartā jaa.e

duur kohsār ke dāman meñ khaḌā ek shajar

kitnī bisrī huī yādoñ kī sadā dohrā.e

saikḌoñ naqsh ubharne ko haiñ bechain magar

in rivāyāt ke patthar ko koī pighlā.e

rah sunsan kaDi dhup pighalte sae

jism se lipTi hui ruh kahan tak jae

sham tak phir mere qadmon mein girega suraj

din mein kitni hi bulandi pe ye par phailae

sang-rezon pe utarti hai kiran ki dewi

rang kohsar ke mukhDe ka nikharta jae

dur kohsar ke daman mein khaDa ek shajar

kitni bisri hui yaadon ki sada dohrae

saikDon naqsh ubharne ko hain bechain magar

in riwayat ke patthar ko koi pighlae