راس آئی بھی تو آئی شان مستانہ مجھے

راس آئی بھی تو آئی شان مستانہ مجھے

ساری دنیا کہہ رہی ہے ان کا دیوانہ مجھے

دل بھی کاشانہ ہے تیرا اس کی دیوانی نہ دیکھ

پھر جلانا ہے چراغ میہماں خانہ مجھے

غنچۂ نورس سے ڈھلنے کو ہے تحریک حیات

گدگداتی ہے شمیم صبح مے خانہ مجھے

عشق کی وارفتگی بھی اک طلسم راز ہے

خود حرم نے بخش دی جاگیر بت خانہ مجھے

المدد اے تابناکیٔ جمال روئے دوست

ناگوار دید ہیں وہ بے حجابانہ مجھے

دور سے نظریں بچا کر جب گزرتی ہے بہار

گلستاں معلوم ہوتا ہے عزا خانہ مجھے

خود مری ہستی ہے ماہرؔ عالم انوار حسن

جلوہ گاہ دوست ہوں سمجھو خدا خانہ مجھے