رہ حیات میں ایسا بھی حال ہوتا ہے

رہ حیات میں ایسا بھی حال ہوتا ہے

خوشی کسی کو کسی کو ملال ہوتا ہے

جو بانٹ لیتا ہے اوروں کا درد ہنس ہنس کر

حقیقتاً وہ بشر با کمال ہوتا ہے

غرور کرتا ہے ناحق تو اپنی ہستی پر

عروج والوں کا اکثر زوال ہوتا ہے

جو ظلم سہتا ہے لیکن زباں سے کہتا نہیں

اس آدمی کا تو جینا محال ہوتا ہے

سنبھل سنبھل کے میں اس جا پہ پاؤں رکھتا ہوں

جہاں بھی اپنی انا کا سوال ہوتا ہے

پھٹے لباس پہ جو لوگ ہنس رہے ہیں ثمرؔ

بتا دو ان کو کہ گدڑی میں لعل ہوتا ہے