sach hai kisi ki shan ye ai naznin nahin

sach hai kisī kī shaan ye ai nāznīñ nahīñ

tū har jagah hai jalva-gar aur phir kahīñ nahīñ

maiñ ne vufūr-e-shauq meñ shāyad sunā na ho

yā shāyad aap hī ne na kī ho nahīñ nahīñ

dast-e-junūñ se qat.a huā pairahan mirā

dāman nahīñ hai jeb nahīñ āstīñ nahīñ

maiñ tum se kyā batā.ūñ ki is vaqt huuñ kahāñ

jab tum ho pesh-e-chashm to phir maiñ kahīñ nahīñ

jab se gunāh chhoḌ diye sab khisak ga.e

ab koī merā dost nahīñ ham-nashīñ nahīñ

'akbar' hamāre 'ahd kā allāh re inqilāb

goyā vo āsmān nahīñ vo zamīñ nahīñ

sach hai kisi ki shan ye ai naznin nahin

tu har jagah hai jalwa-gar aur phir kahin nahin

main ne wufur-e-shauq mein shayad suna na ho

ya shayad aap hi ne na ki ho nahin nahin

dast-e-junun se qata hua pairahan mera

daman nahin hai jeb nahin aastin nahin

main tum se kya bataun ki is waqt hun kahan

jab tum ho pesh-e-chashm to phir main kahin nahin

jab se gunah chhoD diye sab khisak gae

ab koi mera dost nahin ham-nashin nahin

'akbar' hamare 'ahd ka allah re inqilab

goya wo aasman nahin wo zamin nahin