شاخ دل سے خواہشوں کے پھل چراتا کون ہے

شاخ دل سے خواہشوں کے پھل چراتا کون ہے

بعد میں پھر آس کی کلیاں کھلاتا کون ہے

دید کی ہمت نہیں ہے پوچھتا ہے ہر کوئی

آخر شب در ہمارا کھٹکھٹاتا کون ہے

ریزہ ریزہ شکل تیری قطرہ قطرہ آنکھ ہے

یہ بتا دے بے سبب تجھ کو تھکاتا کون ہے

بس دھواں اٹھتا گیا ہر چیز دھندلاتی گئی

لحظہ لحظہ آپ اپنے کو بجھاتا کون ہے

ہاں ہمیں بھی صورتیں مبہم ملی ہیں چار سو

کچھ پتہ ہے شہر میں چہرے مٹاتا کون ہے

خون کا دھارا سڑک کے اس کنارے جا لگا

ٹھہرو دیکھیں اپنی سانسیں اب لٹاتا کون ہے