shakl de koi sabz-mausam ki

shakl de koī sabz-mausam kī

ab zarūrat bahut hai marham kī

phuul kā sar khulā na chhoḌā jaa.e

dhuup dushman bahut hai shabnam kī

ham ko mahfūz kar liyā jaa.e

ham amānat haiñ agle mausam kī

kaun aaya thā in mazāroñ par

lau charāġhoñ kī kis ne maddham kī

kuchh muqaddar thā us kā na milnā

aur kuchh ham ne justujū kam kī

tum ko sochā to hoñT khil uTThe

aur tum ne hī aañkh bhī nam kī

aao ġham bhūlne kī rut aa.ī

botaleñ khol dī ga.iiñ rum kī

log tezī se mar rahe haiñ 'shakīl'

rasm uThne lagī hai mātam kī

shakl de koi sabz-mausam ki

ab zarurat bahut hai marham ki

phul ka sar khula na chhoDa jae

dhup dushman bahut hai shabnam ki

hum ko mahfuz kar liya jae

hum amanat hain agle mausam ki

kaun aaya tha in mazaron par

lau charaghon ki kis ne maddham ki

kuchh muqaddar tha us ka na milna

aur kuchh hum ne justuju kam ki

tum ko socha to honT khil uTThe

aur tum ne hi aankh bhi nam ki

aao gham bhulne ki rut aai

botalen khol di gain rum ki

log tezi se mar rahe hain 'shakil'

rasm uThne lagi hai matam ki