soi hai kali dil ki usko bhi jaga jaana

soī hai kalī dil kī us ko bhī jagā jaanā

is raah se bhī ho kar ai bād-e-sabā jaanā

ham bhūlte jaate haiñ us chehra-e-zebā ko

ai ḳhvāb zarā us kī sūrat to dikhā jaanā

jab mausam-e-gul aa.e ai nik.hat-e-āvāra

aa kar dar-e-zindāñ kī zanjīr hilā jaanā

phir haath chhuḌātī hai mujh se mirī tanhā.ī

phir dil ke sañbhalne ke andāz batā jaanā

kis naaz se paalā hai ham ne ġham-e-hijrāñ ko

us ġham ko zarā aa kar siine se lagā jaanā

auroñ ke liye yuuñ to ik sang-e-garāñ ham haiñ

haañ tum jo kabhī chāho miTTī meñ milā jaanā

āñkhoñ se bhī ab dil kī rūdād nahīñ kahte

ab ham se koī sīkhe har bhed chhupā jaanā

apne hī ḳharābe meñ ham 'umr guzāreñge

jab tum ko mile fursat ye ghar bhī basā jaanā

soi hai kali dil ki us ko bhi jaga jaana

is rah se bhi ho kar ai baad-e-saba jaana

hum bhulte jate hain us chehra-e-zeba ko

ai KHwab zara us ki surat to dikha jaana

jab mausam-e-gul aae ai nikhat-e-awara

aa kar dar-e-zindan ki zanjir hila jaana

phir hath chhuDati hai mujh se meri tanhai

phir dil ke sanbhalne ke andaz bata jaana

kis naz se pala hai hum ne gham-e-hijran ko

us gham ko zara aa kar sine se laga jaana

auron ke liye yun to ek sang-e-garan hum hain

han tum jo kabhi chaho miTTi mein mila jaana

aankhon se bhi ab dil ki rudad nahin kahte

ab hum se koi sikhe har bhed chhupa jaana

apne hi KHarabe mein hum 'umr guzarenge

jab tum ko mile fursat ye ghar bhi basa jaana