sukun-e-qalb ki daulat kahan duniya-e-fani mein

sukūn-e-qalb kī daulat kahāñ duniyā-e-fānī meñ

bas ik ġhaflat sī ho jaatī hai aur vo bhī javānī meñ

tirī pākīza sūrat kar rahī hai husn-e-zan paidā

magar āñkhoñ kī mastī Dāltī hai bad-gumānī meñ

habāb apnī ḳhudī se bas yahī kahtā huā guzrā

tamāsha thā havā ne ik girah de dī thī paanī meñ

kamar kā kyā huuñ 'āshiq khul ga.ī zulf-e-darāz un kī

kamar ḳhud paḌ ga.ī hai ik balā-e-āsmānī meñ

usī sūrat meñ dilkash ḳhūbī-e-alfāz hotī hai

ki husn-e-yār kā paidā kare jalva ma'ānī meñ

adā-e-shukr kar ke ehtirāz aulā hai ai 'akbar'

hazāroñ āfateñ shāmil haiñ un kī mehrbānī meñ

sukun-e-qalb ki daulat kahan duniya-e-fani mein

bas ek ghaflat si ho jati hai aur wo bhi jawani mein

teri pakiza surat kar rahi hai husn-e-zan paida

magar aankhon ki masti Dalti hai bad-gumani mein

habab apni KHudi se bas yahi kahta hua guzra

tamasha tha hawa ne ek girah de di thi pani mein

kamar ka kya hun 'ashiq khul gai zulf-e-daraaz un ki

kamar KHud paD gai hai ek bala-e-asmani mein

usi surat mein dilkash KHubi-e-alfaz hoti hai

ki husn-e-yar ka paida kare jalwa ma'ani mein

ada-e-shukr kar ke ehtiraaz aula hai ai 'akbar'

hazaron aafaten shamil hain un ki mehrbani mein