sulagti dhup barasti ghaTa nahin aai

sulagtī dhuup barastī ghaTā nahīñ aa.ī

hamāre jism pe koī qabā nahīñ aa.ī

tumhāre saath bhī aa.ī na zindagī ham tak

tumhāre baa'd bhī ham tak qazā nahīñ aa.ī

du'ā ko haath uThā.e to kyā huā yaaro

vahī huā ki laboñ tak du'ā nahīñ aa.ī

vo raushnī huī kuchh bhī nazar nahīñ aayā

vo ġhalġhala uThā koī sadā nahīñ aa.ī

uThā bhī abr to ham par baras nahīñ paayā

havā chalī bhī to ham tak havā nahīñ aa.ī

thake hue the ziyāda to so ga.e aur kuchh

tumhārī yaad bhī had se sivā nahīñ aa.ī

sulagti dhup barasti ghaTa nahin aai

hamare jism pe koi qaba nahin aai

tumhaare sath bhi aai na zindagi hum tak

tumhaare ba'd bhi hum tak qaza nahin aai

du'a ko hath uThae to kya hua yaro

wahi hua ki labon tak du'a nahin aai

wo raushni hui kuchh bhi nazar nahin aaya

wo ghalghala uTha koi sada nahin aai

uTha bhi abr to hum par baras nahin paya

hawa chali bhi to hum tak hawa nahin aai

thake hue the ziyaada to so gae aur kuchh

tumhaari yaad bhi had se siwa nahin aai