سلگتی دھوپ برستی گھٹا نہیں آئی

سلگتی دھوپ برستی گھٹا نہیں آئی

ہمارے جسم پہ کوئی قبا نہیں آئی

تمھارے ساتھ بھی آئی نہ زندگی ہم تک

تمھارے بعد بھی ہم تک قضا نہیں آئی

دعا کو ہاتھ اٹھائے تو کیا ہوا یارو

وہی ہوا کہ لبوں تک دعا نہیں آئی

وہ روشنی ہوئی کچھ بھی نظر نہیں آیا

وہ غلغلہ اٹھا کوئی صدا نہیں آئی

اٹھا بھی ابر تو ہم پر برس نہیں پایا

ہوا چلی بھی تو ہم تک ہوا نہیں آئی

تھکے ہوئے تھے زیادہ تو سو گئے اور کچھ

تمہاری یاد بھی حد سے سوا نہیں آئی