taron se bhari rahguzar le ke gai hai

tāroñ se bharī rāhguzar le ke ga.ī hai

ye sub.h charāġhoñ kā nagar le ke ga.ī hai

tum ko to pata hogā ki hamrāh tumhīñ the

duniyā mire ḳhvāboñ ko kidhar le ke ga.ī hai

pyāse the to paanī ko pukārā thā hamīñ ne

naddī idhar aa.ī hai to ghar le ke ga.ī hai

ik manzil-e-be-maqsad o be-nām kī ḳhvāhish

kāñToñ kī savārī pe safar le ke ga.ī hai

be-bāl-o-parī ab bhī sar-e-dasht hai mahfūz

āñdhī to faqat barg o samar le ke ga.ī hai

shāyad ki ab aa.e tirī qurbat kī na.ī fasl

is baar duā bāb-e-asar le ke ga.ī hai

chamkegā abhī zevar-e-shahzādi-e-mahtāb

us tak vo mire shab kī ḳhabar le ke ga.ī hai

taron se bhari rahguzar le ke gai hai

ye subh charaghon ka nagar le ke gai hai

tum ko to pata hoga ki hamrah tumhin the

duniya mere KHwabon ko kidhar le ke gai hai

pyase the to pani ko pukara tha hamin ne

naddi idhar aai hai to ghar le ke gai hai

ek manzil-e-be-maqsad o be-nam ki KHwahish

kanTon ki sawari pe safar le ke gai hai

be-baal-o-pari ab bhi sar-e-dasht hai mahfuz

aandhi to faqat barg o samar le ke gai hai

shayad ki ab aae teri qurbat ki nai fasl

is bar dua bab-e-asar le ke gai hai

chamkega abhi zewar-e-shahzadi-e-mahtab

us tak wo mere shab ki KHabar le ke gai hai