takte hain kitne ghaur se ahl-e-zamin mujhe

takte haiñ kitne ġhaur se ahl-e-zamīñ mujhe

bhejā gayā hai vaqt se pahle kahīñ mujhe

aaya huuñ jab se dasht se vāpas palaT ke maiñ

hasrat se dekhte haiñ yahāñ sab makīñ mujhe

ab ḳhushbuoñ kā mujh ko safar raas hī nahīñ

dikhlā.īyo na koī bhī ḳhvāb-e-hasīñ mujhe

ik ḳhvāb kā ḳhumār kabhī TūTtā nahīñ

ik lamha-e-nashāt mayassar nahīñ mujhe

mujh se koī jahāñ bhī milā yaad hai mujhe

rahte haiñ naqsh yaad sabhī avvalīñ mujhe

le jā sabhī charāġh bhī apne sameT kar

ab raushnī kī koī zarūrat nahīñ mujhe

'jāmī' maiñ apnī jaan ba-sad-shauq vaar duuñ

har chiiz se aziiz hai ye sarzamīñ mujhe

takte hain kitne ghaur se ahl-e-zamin mujhe

bheja gaya hai waqt se pahle kahin mujhe

aaya hun jab se dasht se wapas palaT ke main

hasrat se dekhte hain yahan sab makin mujhe

ab KHushbuon ka mujh ko safar ras hi nahin

dikhlaiyo na koi bhi KHwab-e-hasin mujhe

ek KHwab ka KHumar kabhi TuTta nahin

ek lamha-e-nashat mayassar nahin mujhe

mujh se koi jahan bhi mila yaad hai mujhe

rahte hain naqsh yaad sabhi awwalin mujhe

le ja sabhi charagh bhi apne sameT kar

ab raushni ki koi zarurat nahin mujhe

'jami' main apni jaan ba-sad-shauq war dun

har chiz se aziz hai ye sarzamin mujhe